0

Tərkibi

Təsiredici maddə:  1 tabletin tərkibində 500 mq levofloksasinə ekvivalent miqdarda 512,3 mq levofloksasin hemihidrat vardır.

1 tabletin tərkibində 750 mq levofloksasinə ekvivalent miqdarda 768,45 mq levofloksasin hemihidrat vardır.

Köməkçi maddələr: mikrokristallik sellüloza, polivinilpirrolidon (PVP) K30, kroskarmelloza natrium, maqnezium stearat, hidroksipropilmetilsellüloza (HPMS),

polietilenqlikol 4000, titan dioksid (E 171), talk, sarı dəmir oksidi (E 172).

Təsviri

Dairəvi şəkilli, bölünə bilən, sarı rəngli örtüklü tabletlərdir.

Farmakoterapevtik qrupu

“Flüorxinolonlar” qrupuna aid olan antibakterial maddədir.

ATC kodu: J01MA12.

Farmakoloji xüsusiyyətləri

Farmakodinamikası

MENLOXAN bakteriya hüceyrələrində II tip topoizomeraza ferment qrupuna aid olan DNT -girazanı blokadaya alaraq DNT-nin əmələgəlmə prosesini pozmaqla və bakteriya hüceyrəsinin divarını dağıtmaqla güclü bakterisid təsir göstərir.

MENLOXAN aşağıdakı mikroorqanizmlərə qarşı yüksək həssaslığa malikdir: Enterococcus faecalis, Staphylococcus aureus, Staphylococcus epidermidis, Streptococcus pneumoniae,  Streptococcus pyogenes və Streptococcus agalactiae, Enterobacter sakazakii, Escherichia coli, Haemophilus influеnzае, Haemophilus parainfluenzae, Klebsiella pneumoniae, Klebsiella oxytoca, Legionella pneumoniae, Moraxella catarrhalis, Proteus mirabilis, Pseudomonas aeruginosa, Pseudomonas fluorescens, Chlamydia pneumoniae, Mycoplasma pneumoniae,  Acinetobacter anitratus, Acinetobacter baumannii, Acinetobacter calcoaceticus, Bordetella pertussis, Citrobacter diversus, Citrobacter freundii, Morganella morganii, Proteus vulgaris,  Providencia rettgeri, Providencia stuartii, Serratia marcescens, Clostridium perfringens.

Farmakokinetikası

Daxilə qəbul olunduqdan sonra, mədə-bağırsaq traktından sürətlə və demək olar ki, təmamilə sorulur. Qida qəbulu preparatın sorulmasına az təsir etdiyindən biomənimsənilmə 99% təşkil edir. Qan plazmasında maksimal konsentrasiya (Cmax) preparatın qəbulundan 1 saat ərzində toplanır və 500 mq doza qəbulu zamanı müvafiq olaraq 5.2 mkg/ml çatır. Plazma zülalları ilə birləşməsi 30-40% təşkil edir. Orqan və toxumalara yüksək dərəcədə nüfuz etdiyindən, 500 mq dozada təyini zamanı: ağciyər toxumasında 11,3 mkq/ml, bronxların selikli qişasında 8,3 mkq/ml, bəlğəmdə 10,8 mkq/ml doza həddinə çatır və bu doza 4-8 saat saxlanılır; sidik-cinsiyyət orqanlarında 8,1-11,3 mkq/ml, prostat vəzi toxumasında 8,2-8,7 mkq/ml, sidikdə isə 100-150 mkq/ml doza həddinə çatır və bu doza 24-36 saat saxlanılır.  T1/2 – 6-8 saat təşkil edir. Orqanizmdən əsasən böyrəklərlə – 90 %, nəcislə – 5%, tər və tənəffüslə isə 4-5 % xaric edilir.

İstifadəsinə göstərişlər

  • Aşağı tənəffüs yollarının infeksion-iltihabi xəstəlikləri: kəskin və xroniki bronxit, pnevmoniya, bronxopnevmoniya, plevrit.
  • Yuxarı tənəffüs yollarının infeksion-iltihabi xəstəlikləri: rinit, sinusit (frontit, haymorit, eitmoidit, sfenoidit), kəskin və xroniki otit.
  • Sidik yollarının və böyrəyin infeksion-iltihabi xəstəlikləri: sistit, uretrit, pielonefrit.
  • Reproduktiv orqanların infeksion-iltihabi xəstəlikləri: kişilərdə – balanit, orxit, epididimit, orxoepididimit, prostatit;  qadınlarda – vulvit, vaginit, vulvovaginit, salpingit, ooforit, salpinqooforit, iltihabi
  • Qarın boşluğu orqanlarının infeksion-iltihabi xəstəlikləri.
  • Dəri və yumşaq toxumaların infeksion-iltihabi xəstəlikləri: iltihablı ateroma, abses, furunkul, karbunkul.
  • Sümük və oynaqların infeksion-iltihabi xəstəlikləri: artrit, osteoartrit, osteomielit.
  • Cərrahi əməliyyatlardan əvvəl və sonra profilaktika məqsədi ilə.

 Əks göstərişləri

MENLOXAN tabletlərini aşağıdakı hallarda qəbul etmək olmaz:

  • Əgər levofloksasinə, hər hansı digər xinolon antibiotikinə və ya preparatın hər hansı digər inqrediyentinə qarşı allergiyanız (yüksək həssaslığınız) varsa.
  • Epilepsiyanız varsa və ya nə vaxtsa olmuşdursa.
  • “Flüorxinolon antibiotikləri” ilə müalicə ilə bağlı vətər problemləriniz (məs., tendinit) olmuşdursa.
  • Hamiləsinizsə, hamilə olmağa hazırlaşırsınızsa və ya hamilə olduğunuza şübhəniz varsa.
  • Uşaq əmizdirirsinizsə
  • Uşaq və ya yeniyetməsinizsə.

Xüsusi göstərişlər və ehtiyat tədbirləri

– Ağır allergik reaksiya Levofloksasin tabletlərinin çox nadir hallarda baş veren əlavə təsiridir. Bunun əlamətləri səpgi, udma və ya nəfəsalma problemləri, dodaqlarınızın, üzünüzün, qırtlaq və ya dilinizin şişkinliyi ola bilər. Əgər Siz bu əlamətlərdən hər hansı birini hiss etsəniz Levofloksasin tabletlərinin qəbulunu dayandırın və dərhal həkimlə əlaqə saxlayın.

– MENLOXAN tabletləri ilə müalicə müddətində lazımsız olaraq güclü günəş şüaları qarşısında durmayın və solyari günəş lampasından istifadə etməyin, çünki bəzi pasiyentlər MENLOXAN tabletlərini qəbul edərkən onlarda işığa qarşı həssaslıq yarana bilər.

– MENLOXAN tabletləri nadir hallarda vətərlərdə ağrı və iltihab törədə bilər. Xüsusilə, yaşlı pasiyentlərdə və ya kortikosteroid qəbul edən pasiyentlərdə. Əgər Sizin bu preparatı qəbul etdikdən az müddət sonra vətərlə bağlı şikayətiniz olarsa, dərhal tibbi məsləhət üçün müraciət edin və vətərin zədələnməsindən qaçmaq üçün vətə rolan nahiyəyə istirahət verin.

– Keçmişdə beyin zədəsi almısınızsa (şok və ya ağır beyin zədəsi kimi), bayılmanın (özündəngetmə) başvermə riski yüksələ bilər. Bu halda MENLOXAN tabletlərini qəbul etməyin və dərhal həkiminizə müraciət edin.

– Əgər MENLOXAN tabletləri ilə müalicə zamanı və ya müalicədən sonra Sizdə qanlı ishal yaranarsa, müalicəni dayandırın və dərhal həkiminizə müraciət edin. Bu, ciddi bağırsaq iltihabının (psevdomembranoz kolit) əlaməti ola bilər, hansı ki, antibiotiklərlə müalicədən sonra baş verə bilər.

– Əgər Sizdə nə vaxtsa əqli inkişafla bağlı problem olmuşdursa, MENLOXAN tabletlərini qəbul etməzdən əvvəl həkiminizlə məsləhətləşməlisiniz.

– Qlükoza-6-fosfat dehidrogenaza adlanan fermentin çatışmazlığı (nadir irsi xəstəlik) olan pasiyentlər xinolon antibakterial vasitələri ilə müalicə olunarkən qırmızı qan hüceyrələrinin dağılmasına (hemolizə) meylli ola bilər, ona görə də MENLOXAN tabletləri belə pasiyentlərdə ehtiyatla istifadə olunmalıdır.

– Levofloksasin başlıca olaraq böyrəklər vasitəsilə xaric olunduğu üçün böyrəklərin funksional çatışmazlığı olan pasiyentlərdə MENLOXAN tabletləri ehtiyatla istifadə olunmalıdır.

– MENLOXAN tabletləri ilə eyni zamanda insulin və ya oral hipoqlikemik dərmanlar alan, şəkərli diabeti olan pasiyentlər qanda şəkərin miqdarının aşağı olması riskinə (hipoqlikemiya) malik ola bilərlər. Belə diabetik pasiyentlərdə qan şəkərinin ciddi monitorinqinin aparılması tövsiyə olunur.

– MENLOXAN tabletləri ilə müalicə müəyyən tip sinir zədələnməsinə səbəb ola bilər, hansı ki, qəflətən başlaya bilər. Əgər Siz qismən hissiyyatınızı itirsəniz və ya həssaslığınız zəifləsə, bunun geridönməz xarakter almasının qarşısını almaq üçün lütfən həkiminizə müraciət edin və müalicəni dayandırın.

– MENLOXAN tabletləri qəbul edən insanlarda sidik analizləri güclü ağrıkəsici maddələr olan “opiatlar” adlandırılan maddələrə “yanlış-müsbət” nəticə verə bilər. Əgər həkiminiz sidik analizı aparmalıdırsa, ona MENLOXAN tabletləri qəbul etdiyinizi bildirin.

MENLOXAN qəbul etməzdən əvvəl

  • Ürəklə bağlı problemlər

Əgər Sizdə anadangəlmə və ya ailə anamnezində QT intervalının uzanması varsa (ürəyin EKQ-nə əsasən), qanda elektrolitlərin balansı pozulmuşdursa (xüsusilə qanda kaliumun və ya maqneziumun səviyyəsinin azalması), ürək ritmi zəifdirsə (bradikardiya), ürəyiniz zəifdirsə (ürək çatışmazlığı), miokard infarktı keçirmisinizsə, Siz qadınsınızsa və ya yaşlısınızsa və ya EKQ-də qeyri-normal dəyişikliklərə səbəb ola bilən digər dərmanlar qəbul edirsinizsə, bu qrup dərman qəbul edərkən ehtiyatlı olmalısınız.

  • Uşaqlar

MENLOXAN tabletlərini qəbul etməməlidirlər.

  • Hamilə və süd verən analar

Əgər Siz hamiləsinizsə, hamilə olma qabiliyyətiniz varsa və ya hamilə ola biləcəyinizi düşünürsünüzsə, o zaman MENLOXAN tabletlərini qəbul etməyin. Əgər uşaq əmizdirirsinizsə, MENLOXAN tabletlərini qəbul etməyin.

MENLOXAN tabletlərini qəbul etməyə başlamazdan əvvəl həkiminizlə məsləhətləşin, xüsusilə, əgər Sizdə böyrək çatışmazlığı varsa.

Digər dərman vasitələri ilə qarşılıqlı təsiri

Reseptsiz buraxılan dərmanlarda daxil olmaqla hər hansı digər dərman qəbul edirsinizsə və ya yaxın zamanlarda qəbul etmisinizsə, lütfən bu barədə həkiminizə və ya əczaçınıza məlumat verin. Bu, xüsusilə aşağıdakı dərmanlara aiddir:

– Dəmir duzları (anemiyanın müalicəsi üçün istifadə olunur), maqnezium və ya alüminium tərkibli antasidlər (mədə qıcqırmasına və mədə ağrısına qarşı dərmanlar) və sukralfat (mədə divarını müdafiə üçün dərman) MENLOXAN tabletlərinin qəbulundan 2 saat əvvəl və ya sonra qəbul edilməlidir. Əks təqdirdə onlar levofloksasinin absorbsiyasını ve effektivliyini azalda bilər.

– Teofillin (astmanın müalicəsi üçün), fenbufen və ya oxşar qeyri-steroid iltihab əleyhinə preparatlar (QSİƏP) levofloksasin ilə birlikdə verildikdə “bayılma” riski yüksələ bilər.

– Probenesid (artritin müalicəsi üçün) və simetidin (mədə turşusunu azaltmaq üçün) levofloksasinin böyrəklər vasitəsilə xaric olmasını azalda bilər, xüsusilə böyrək çatışmazlığı olan pasiyentlərdə.

– Siklosporin (immunodepressant) – MENLOXAN siklosporinin təsir müddətini uzada bilər.

– K vitamininin antaqonistləri (məs., qanın laxtalanmasının qarşısını alan varfarin). MENLOXAN Kvitamininin antaqonistlərini qəbul edən pasiyentlərdə qanaxmanın artmasına səbəb olur. K vitamininin antaqonistləri ilə müalicə olunan pasiyentlərdə koaqulyasiya testlərinin monitorinqi aparılmalıdır.

– Bəzi antibiotiklər nadir hallarda kontraseptiv tabletlərin effektivliyini azalda bilər.

– Əgər Siz ürək ritmini dəyişə bilən digər dərmanlar: antiaritmik dərmanlar (məs., xinidin, hidroxinidin, dizopiramid, amiodaron, sotalol, dofatilid, ibutilid), trisiklik antidepressantlar, bəzi antimikrob dərmanlar (makrolidlər qrupuna daxil olan), bəzi antipsixotik dərmanlar, kortikosteroidlər qəbul edirsinizsə, bu barədə həkiminizə məlumat verməlisiniz.

Hamiləlik və laktasiya dövründə istifadəsi

Hamiləlik

Dərmanı istifadə etməzdən əvvəl həkiminizə və ya əczaçınıza məlumat verin.

Hamilə qadınlar üçün kifayət qədər və yaxşı nəzarət edilən tədqiqatlar aparılmadığı üçün,  MENLOXAN hamiləlik dövründə istifadə edilməməlidir.

Əgər müalicə zamanı hamilə olduğunuzu aşkarlasanız, dərhal həkiminizə və ya əczaçınıza məlumat verin.

Laktasiya

Dərmanı istifadə etməzdən əvvəl həkiminizə və ya əczaçınıza müraciət edin.

MENLOXAN tableti laktasiya zamanı istifadə edilməməlidir.

 

Nəqliyyat vasitəsini və digər potensial təhlükəli mexanizmləri idarəetmə qabiliyyətinə təsiri

MENLOXAN tabletləri avtomobilin idarə edilməsi və maşınlardan istifadə qabiliyyətinə az və ya orta dərəcədə təsir göstərir. Başgicəllənmə, yuxuya meyllik, görmə pozğunluqları kimi bəzi əlavə təsiriər Sizin diqqətinizi toplama qabiliyyətinizə və reaksiyanıza mənfi təsir göstərə bilər. Əgər diqqətinizi toplama qabiliyyətinizin və reaksiyanızın pozulduğunu hiss etsəniz avtomobil idarə etməkdən və ya maşın istifadə etməkdən çəkinin.

İstifadə qaydası və dozası

Həmişə MENLOXAN tabletlərini həkiminizin sizə söylədiyi kimi qəbul edin. Əgər nəyəsə əmin deyisinizsə, həkiminizdən və ya əczaçınızdan soruşun. Müalicənin müddəti infeksiyanın növündən və ağırlığından asılıdır. Adi doza gündə bir və ya iki tabletdir. Böyrək çatışmazlığı olan pasiyentlərə böyrək funksiyaları normal olan pasiyentlərə nisbətən aşağı doza lazım ola bilər. Dəmir duzları (anemiyanın müalicəsi üçün istifadə olunur), maqnezium və ya alüminium tərkibli antasidlər (mədə qıcqırmasına və mədə ağrısına qarşı dərmanlar) və sukralfat (mədə divarını müdafiə üçün dərman) MENLOXAN tabletlərinin qəbulundan 2 saat əvvəl və ya sonra qəbul edilməlidir. Əks təqdirdə onlar levofloksasinin absorbsiyasını və effektivliyini azalda bilər. Tabletlər yemək zamanı və ya yeməkarası başqa vaxtlarda qəbul edilə bilər. Tabletləri bir stəkan su ilə udmaq lazımdır.

Əlavə təsirləri

Bütün dərmanlar kimi, MENLOXAN tabletləri də, hamıda olmasa da, əlavə təsirlər törədə bilər. MENLOXAN tabletlərinin istifadəsi zamanı aşağıda qeyd edilən əlavə təsirlər müşahidə edilmişdir. Onlar başvermə tezliyinə müvafiq olaraq sadalanır:

Tez-tez (10-100 nəfərdən 1-də)

Ürəkbulanma və diareya

Qanda bəzi qaraciyər fermentlərinin səviyyəsinin yüksəlməsi

Bəzən (100-1000 nəfərdən 1-də)

Rezistent mikroorqanizmlərin artması, məs., funqal infeksiya.

Qan analizində nəticələrin təhrif olunması (ağ qan hüceyrələrinin miqdarının artması və ya azalmasına dair yanlış nəticə).

Başağrısı, başgicəllənmə, başın hərlənməsi, əsəbilik, yuxululuq və yuxuya getmənin çətinləşməsi

Iştahanın itməsi, qusma, mədə ağrısı, meteorizm, qəbizlikvə dispepsiya.

Qaraciyər funksiyalarının qeyri-normallığına dair aparılan qan analizinin nəticələrində dəyişiklik (az olan bilirubinin miqdarının analizin nəticələrinə görə yanlış yüksək olması).

Qaşınma, səpgi.

Böyrək funksiyalarına görə aparılan qan analizi nəticələrinin dəyişməsi.

Zəiflik və ya gücdəndüşmə.

Nadir (1000-10000 nəfərdən 1-də)

Qanda neytrofillərin sayının azalması (ağ qan hüceyrələrinin bir növü).

Trombositlərin sayının azalması

Qeyri-həssaslıq, qulaqlarda cingilti və iynəsancma hissi.

Qeyri-iradi əsmə.

Generalizəolunmuş qorxu (narahatlıq).

Həddindən artıq kədərli olmaq (depressiya).

Narahatlıq (həyəcan).

Reallıqda olmayan şeyləri görmək, eşitmək və ya onların olmasına inanmaq (psixi pozğunluq). Çaşqınlıq.

Əzələlərin nəzarətoluna bilməyən yığılması (qıcolma).

Ürək yığılmaları tezliyinin artması.

Qan təzyiqinin aşağı düşməsi.

Tənəffüs yollarının daralması, məs., astma və nəfəsalmanın çətinləşməsi.

Qanlı ishal, hansı ki, çox nadir hallarda nazik və yoğun bağırsağın iltihabının göstəricisi ola bilər, hansı ki, ağır və ağrılı ishala (diareyaya) səbəb ola bilər.

Qaşınan dəri səpgisi.

Oynaq ağrısı.

Əzələ ağrısı.

Vətərlərin iltihabı da daxil olmaqla, vətər pozğunluqları.

Çox nadlr (10000 nəfərdən 1 -dən azında baş verir)

Neytrofillərin (ağ qan hüceyrəərinin bir növü) ağır, kəskin çatışmazlığı. Bunun simptomlarına yüksək temperatur və ağızda və boğazda xora daxildir.

Reallıqda olmayan şeyləri görmək və eşitmək.

Suisidal fikir və hərəkət halları ilə birlikdə fikir və düşüncələrdə (psixotik reaksiya) dəyişiklik.

Ağır allergik reaksiya. Bunun əlamətlərinə səpgi, udma və nəfəsalma problemləri, dodaqların, üzün, udlağın şişməsi.

Sirkulyator kollaps.

Qanda şəkərin səviyyəsinin çox aşağı düşməsi (hipoqlikemiya), hansı ki, diabetdən müalicə olunan pasiyentlər üçün xüsusi əhəmiyyət daşıya bilər.

Yanğı hissi, qulaqlarda cingilti, ağrı və ya keyləşmə. Bunlar bəzən “neytropeniya” adlanan xəstəliyin əlamətləri ola bilər.

Allergik ağciyər reaksiyaları.

Qaraciyərin iltihabı.

Dərinin günəş şüalarının və ultrabənövşəyi şüaların təsirinə qarşı həssaslığının artması baş verə bilər.

Eşitmə və ya görmə ilə bağlı problemlər və ya dadbilmə və iybilmə yollarında dəyişikliklər.

Vətər qırılması; bu arzuolunmaz təsir müalicənin başlanmasından sonra 48 saat ərzində baş verə və bilateral (hər iki – həm sağ, həm də sol tərəfli təsir ola bilər) ola bilər.

Əzələ zəifliyi, hansı ki, miasteniya qravis-i (sinir sisteminin nadir xəstəliyi) olan pasiyentlər üçün xüsusi əhəmiyyət daşıya bilər.

Allergik böyrək reaksiyalarının (interstisial nefrit) hesabına kəskin böyrək çatışmazlığı.

Qızdırma.

Tezliyi məlum olmayan (əldə olan məlumatlara görə başvermə tezliyini müəyyən etmək mümkün deyil)

Stivens-Conson sindromu, toksik epidermal nekroliz (Layell sindromu, hansı ki, dəridə qabar və qabıqlanma ilə təzahür edir) və multiformalı eritema kimi, ağır bullyoz (qabar-tipli) səpgilər. Bəzi hallarda, hətta ilk dozadan sonra dəridə dəyişiklik (məs., övrə və ya dəriyə qan dolması) baş verə bilər.

Həddindən artıq tərləmə (hiperhidroz).

Qulaqlarda küy və ya cingilti (tinnit).

Qan hüceyrələrinin zədələnməsi nəticəsində qırmızı qan hüceyrələrinin azalması (anemiya).

Qan hüceyrələrinin bütün növlərinin miqdarının azalması.

İmmun cavab reaksiyasının yüksəlməsi (yüksək həssaslıq).

Ürəklə bağlı problemlər: ürək ritminin qeyri-normal sürətlənməsi, ürəyin həyat üçün təhlükəli qeyri-müntəzəm ritmi, ürək ritminin dəyişməsi (“QT- intervalının uzanması” adlanan və EKQ-də ürəyin elektrik aktivliyində görünən).

Əzələ hüceyrələrinin zədələnməsi (rabdomioliz) ilə əzələ reaksiyaları.

Levofloksasinlə müalicə zamanı qaraciyərin kəskin çatışmazlığı daxil olmaqla, qaraciyərin ağır zədələnməsi barədə məlumat verilmişdir, xüsusilə ağır əsas xəstəliyi (mes., septisemiya) olan pasiyentlərdə.

Dərinin saralması və ya gözlərin solğunlaşması (sarılıq).

Beldə, döş qəfəsində və ətraflarda ağrı.

Flüorxinolonların istifadəsi ilə bağlı yaranan digər arzuolunmaz təsirlərə aşağıdakılar aiddir:

Vaskulit (kiçik qan damarlarının iltihabı).

Ekstrapiramidal (nevroloji) pozğunluqlar və əzələ koordinasiyasının digər pozğunluqları.

Porfiriyası olan pasiyentlərdə porfiriyanın (metabolizmə təsir göstərən xəstəlik) baş qaldırması.

Əgər əlavə təsirlərdən hər hansı biri ciddi xarakter alarsa və ya bu içlik vərəqədə qeyd edilməyən hər hansı əlavə təsir meydana çıxarsa, lütfən bu barədə həkiminizə və ya əczaçıya məlumat verin.

Doza həddinin aşılması

Əgər lazım olduğundan artıq MENLOXAN tabletləri qəbul etmisinizsə, həkiminizlə əlaqə saxlayın və ya yaxınlıqdakı xəstəxananın ilk yardım şöbəsinə müraciet edin. Doza həddi aşılmasının simptomları başgicəllənmə, konfuziya, hissiyyatın pisləşməsi, qıcolma tutmaları, ürəklə bağlı problemlər və ürəkbulanma ola bilər.

Əgər MENLOXAN tabletlərinin bir dozasının qəbulunu unutmusunuzsa, onu mümkün qədər tez növbəti dozanın qəbul vaxtına az qalmamış, xatırlayan kimi qəbul edin. MENLOXAN tabletlərinin unudulmuş dozasını əvəz etmək üçün ikiqat doza qəbul etməyin.

Müalicə kursunu həkiminizin müəyyən etdiyi vaxt dayandırmağınız vacibdir. Hətta özünüzü yaxşı hiss etməyə başlasanız, müalicə kursu bitməyincə müalicəni dayandırmayın. Əgər Siz müalicəni vaxtından tez dayandırsanız, infeksiya geri dönə və Sizin vəziyyətiniz pisləşə və ya bakteriyaların dərmana qarşı rezistentliyi yarana bilər. Əgər Siz dərmanın əlavə təsirlərinə görə müalicəni dayandırmalı olduğunuzu düşünürsünüzsə, növbəti dozanı qəbul etməzdən əvvəl məsləhət üçün həkiminizə müraciət edin.Əgər Sizin bu dərmanın istifadəsinə dair hər hansı əlavə suallarınız varsa, həkiminizdən və ya əczaçınızdan soruşun.

Buraxılış forması

MENLOXAN 500 mq 7 tablet, blisterdə. 1 blister, içlik vərəqə ilə birlikdə karton qutuya qablaşdırılır.

MENLOXAN 750 mq 7 tablet, blisterdə. 1 blister, içlik vərəqə ilə birlikdə karton qutuya qablaşdırılır.

Saxlanma şəraiti

25ºС-dən yüksək  olmayan temperaturda və uşaqların əli çatmayan yerdə saxlamaq lazımdır.

Yararlılıq müddəti

2 il.

Yararlılıq müddəti bitdikdən sonra istifadə etmək olmaz.

Aptekdən buraxılma şərti

Resept əsasında buraxılır.

İstehsalçı

Recordati İlaç San. ve Tic. A.Ş.

Ç.O.S.B. Karaağaç Mah. Atatürk Cad.

No: 36 Kapaklı / TEKİRDAĞ.

Ünvan

Recordati İlaç San. ve Tic. A.Ş.

Ç.O.S.B. Karaağaç Mah. Atatürk Cad.

No: 36 Kapaklı / TEKİRDAĞ.

Tel.: 0 282 999 16 00.